АСТАНА. KAZINFORM – Бүгін Президент дене шынықтыру және спорт саласындағы жаңа заңға қол қойды. Бұл заң кәсіби спортшылардан бастап, балаларын спортқа беріп жүрген ата-аналар мен салауатты өмір салтын ұстанатын азаматтарға дейін баршаға қатысты маңызды.
Парламент Мәжілісінің депутаты Асхат Аймағамбетов заңның басты жаңалықтарын атап көрсетті. Депутаттардың айтуы бойынша, заң жобасы ұзақ әрі мұқият қаралып, легионерлерді қаржыландыруға бюджет пен квазимемлекеттік сектордан, мысалы, «Самұрық-Қазына» қорының ақшасынан тыйым салынады. Бұл қаржы енді отандық спортшыларды қолдауға жұмсалады.
Ал ұлттық спорт түрлері, мысалы, қазақша күрес, асық ату, көкпар, басымдықтар тізіміне енгізілді, сонымен қатар бұқаралық спорт негізгі басымдық ретінде белгіленді.
Спорт саласы вертикаль басқару жүйесіне көшіп, министрліктен әкімдікке дейін үйлесімді жұмыс істейтін болады. Спорт федерацияларына қатысты республикалық құрылыммен байланыс орнату, тәртіп пен тиімділікті қамтамасыз ету үшін қажет. Сондай-ақ, спорт мекемелерінің басшылары енді ротация арқылы тағайындалатын болады, яғни мәңгілік жетекшілердің кезеңі аяқталды. Бұл ереже мектеп директорларына да қатысты.
Мүгедек атлеттердің еріп жүретін адамдардың шығыны мемлекет есебінен өтеледі, бұл депутаттардың бастамасы. Сондай-ақ, әр спорт түрі бойынша жас шектеулері нақты белгіленіп, балалардың қауіпсіздігі басты назарға алынады. Антидопинг ережелерін бұзған адамдарға жауапкершілік күшейтіледі.
Спорттық медицина саласының жұмысы да заңмен реттеліп, бюджет енді негізгі спорт түрлеріне бағытталатын болады. Спорт ұйымдарына ақылы қызмет көрсету және табыс табу мүмкіндігі беріледі, ал бұл қаражат ұйымдардың өз есепшотына түседі.
Туризм және спорт министрінің орынбасары Серік Жарасбаев спорт саласындағы реформалар туралы баяндап өткен. Заңның енгізгелі берері көп, спорттың дамуы мен азаматтардың дене шынықтырумен айналысуына қолайлы жағдай жасау мәселелері назардан тыс қалмайды.
